ILOILO CITY – Indi magpaareglo ang pamilya sang mag-asawa nga sanday Joe Marie kag Alnie Dinah Osano nga nabunggu-an patay sang Mazda MX5 sports car sa Sen. Benigno Aquino Jr. Avenue, Mandurriao, Iloilo City.
Ini matapos nga napasakaan na sang kaso nga reckless imprudence resulting to double homicide ang driver nga si June Paul Valencia.
Sa interview sang Bombo Radyo kay Socorro Pet Castro, utod ni Alnie Dinah Pet-Osano, iya ginpahayag nga maayo nga balita para sa ila nga napasakaan na sang kaso si Valencia.
Ginpahayag ni Castro nga wala man sang may luyag nga may matabo nga aksidente kag dapat gid nga mapreso ang driver sang sports car.
Bisan ano ang matabo, ginpahayag ni Castro nga wala sang areglo nga matabo bangud nga desidido ang ila pamilya nga ipadayon ang kaso agud nga mahatagan sang hustisya ang kamatayon sang mga biktima.
Samtang, ginkumpirma naman ni Elsie Lazo Osano, utod ni Joe Marie Osano, nga makapila ka beses nga gintanyagan sila sang kwarta kabaylo sang areglo sa kaso.
Ginpahayag ni Osano nga duha ka milyon ka pesos ang ginatanyag sa ila.
Sa pihak sini, ginpahayag ni Osano nga wala sila nagakinahanglan sang kwarta bangud nga indi mabayluhan sang kwarta ang kabuhi sang ila himata.
