ILOILO CITY – Bali ang tuo nga kamot kag pilas sa nagkalain-lain nga bahin sang lawas ang naangkon sang soltero nga ginlamon sang meat mixer sang processed frozen food sa Barangay Mansaya Lapuz Iloilo City.
Ang biktima amo si Jomar Junco, 18 anyos sang Laua-an Antique.
Sa interview sang Bombo Radyo kay Jojo, embalsamador sang punerarya, iya ginpahayag nga may posibilidad nga naglupok ang bagul ni Junco bangud naglain na ang kurti sang iya nga ulo.
Suno kay Jojo, may pilas sa wala nga bahin sang nawong, idalom sang mata, sa agtang, sa dughan kag mismo sa tiil sang biktima.
Apang sa nangin sitwasyon ni Junco sang siya ang nagaling sa mixer, ang iya tiil lamang ang nabilin nga wala makasulod sa nasambit nga makina.
Ginabanta yara sa 5’3 ukon 5’4 ang kataason sang biktima.
Dugang pa sang natungdan, ila nga ginguba ang gamay nga bahin sang mixer agud nga matigayon nga makuha si Junco bangud naipit gid ini sa makina.
Nahibaluan nga mahumok pa ang bangkay sang biktima sang ginkuha sang punerarya sa nasambit nga lugar.
