Gin-engganyo ni Philippine National Police (PNP) Chief Gen. Oscar Albayalde ang mga myembro sang pulis nga naka-eksperyensya sang papang-abuso sang ila mga superior nga magguwa kag ibuyagyag sa publiko agud nga mapasakaan sang kaso.
Suno kay Albayalde, indi siya magduha-duha nga pasabton ang mga police officials nga nagapang-abuso sang ila mga katapo nga kapulisan kaangay sang ginhimo ni Eastern Police District (EPD) director Brig. Gen. Christopher Tambungan nga isa man ka anay Deputy Regional Director for Operations sa Police Regional Office (PRO) 6.
Si Gen. Tambungan ang nangin kontrobersyal bangud ginapangsakit niya ang pila ka mga pulis lakip na ang isa ka policewoman sang nakaligad nga bulan.
Wala ginadula ni Albayalde ang posibilidad nga may yara pa sang kaangay nga kaso nga pagpang-abuso sa iban nga mga pulis.
Ginasiguro naman sang PNP Chief sa mga biktima nga mahatagan sang patas nga imbestigasyon kag indi sini pag i-tolerar ang mga pagpang-abuso nga ginahimo sang mga senior officers.
Nahibaluan nga si Tambungan ang gin-relieve sa posisyon samtang padayon ang imbestigasyon sa kaso nga physical kag verbal abuse nga ginpasaka ni Police Corporal April Santiago.
