Kaugot ang ginabatyag sang pamilya ni Baltasar Cresosto Saldo,54 anyos sang Brgy. Sto. Angel, Dumalag, Capiz matapos nasal-an nga mataas nga lider sang Communist Party of the Philippines -New People’s Army (CPP-NPA).
Sa interview sang Bombo Radyo kay Nilo Saldo,49 anyos manghod ni Baltasar Saldo, iya ginpahayag nga indi nila mabaton nga nahuy-an ang ila pamilya bangud sa sala nga pagpasibangud sa iya utod sang gintudlo ini nga anay Commanding Officer sang Roger Mahinay Command, Komiteng Rehiyon-Negros sang (CPP-NPA).
Suno kay Nilo Saldo, ginbatyag gid sang pamilya ilabi na sang duha ka kabataan ni Baltasar ang kahuy-anan nga naagom sang ila pamilya sang ginpresentar ini sa media kag ginpadayaw pa sang Police Regional Office (PRO) 6 kag 61st Infantry Battallion sang Philippine Army bilang major accomplishment.
Suno sa manghod nga Saldo, imposible nga mangin mataas nga lider sang rebelde ang iya magulang bangud kilala niya ini kag wala ini nakahalin sa ila lugar humalin sang una tubtob subong kag nagapangabuhi lamang ini bilang isa ka driver.
