DUMALAG CAPIZ- Nagapalangurog sa gihapon sa kulba ang 54 anyos nga si Baltasar Cresosto Saldo sang Brgy. Sto. Angel Dumalag Capiz
matapos nasal-an nga lider sang Communist Party of the Philippines-New Peoples Army(CPP-NPA).
Sa interview sang Bombo Radyo kay Saldo, iya ginpahayag nga tubtob subong halos indi siya makapati sa nagkalatabo sa iya.
Gin-isip man niya nga katapusan na sang iya kabuhi ang pagdakop sa iya.
Suno kay Saldo, ginkakibot man niya ang natabo nga pagdakop sa iya sang katapo sang Regional Intelligence division sang Police Regional Office (PRO) 6 kag sang 61st Infantry Batallion sang Philippine Army.
Ginpahayag ni Saldo nga nakibot siya sang may nagdulog nga itom nga salakyan, may nagpanaog nga mga nakasibilyan, armado kag ginhambalan siya nga mahapa kag gintapak ang iya ulo.
Gindala siya sa Cuartero Municipal Police Station kag didto siya ginhambalan kun ano ang iya nahimo nga sala.
Ginsaysay man niya nga gindala siya sa isa ka police station sa syudad sang Iloilo kag pagkasunod nga adlaw ginkakibot niya sang nagsulod siya sa isa ka hulot kag nakita ang presensya sang media lakip na ang
pagpresenta sa iya ni PRO 6 Regional Director John Bulalacao bilang si Virgilio Paragan alyas Hassan nga kinakabig anay mataas nga lider sang Roger Mahinay Command Komiteng Rehiyon-Negros sang CPP-NPA.Samtang tuman man ang
iya pagpasalamat sa hepe sang Kabankalan Police Station nga nagpaverify sang identity lakip na ang pagpasigurado nga makabalik siya sa Iloilo nga hilway.
Ginpasalamatan man niya ang pamilya Paragan nga nakabulig man sang dako sa pagklaro sang iya ngalan nga indi siya ang ginatumod nga mataas nga lider sang CPP-NPA.
Nagahingyo naman siya sa mga natungdan nga tinloon ang iya pangalan bangud apektado kag nahuy-an siya kag ang iya bug-os nga pamilya sa natabo.
