ILOILO – Ginaproseso na subong ang paghatag sang 4th tranch ukon ikaapat nga hugnat sang sweldo sang mga empleyado sang Iloilo Provincial Government.
Ini matapos nga ginpirmahan na ni outgoing Iloilo Gov. Arthur Defensor Sr. ang 2019 annual provincial budget.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga ginpadala kag ginreview ang nasambit nga dokumento sa Department of Budget and Management (DBM).
Sa subong suno kay Mamom, tanan nga mga department sa Iloilo Provincial Capitol ang naga proseso na sang dokumento agud mapreparar na sang Human Resource Department ang Notice of Salary Adjustment (NOSA) kag mapirmahan na sang gobernador.
Ginpahayag ni Mamon nga tingob nga mabaton sang mga empleyado ang ila salary increase humalin sa bulan sang Enero tubtub Hunyo subong nga tuig.
Nakadepende naman suno kay Mamon ang saka sa sweldo sa Salary Grade sang isa ka empleyado.
Samtang, ginkumpirma man ni Atty. Mamon nga magapadayon na ang proyekto sang Probinsya sang Iloilo nga wala natigayon humalin sang bulan sang Enero.
Suno kay Mamon, gina proseso na subong sang Provincial Budget Office ang mga dokumento nga kinahanglanon agud maumpisahan na ang mga proyekto sa labing madali nga panahon.
Gin athag man ni Mamon nga apisar bag-o na ang administrasyon sa pagpamuno ni incoming Iloilo Gov. Arthur ‘Toto’ Defensor Jr. magapadayon sa gihapon ang mga proyekto.
