LEON, ILOILO – Nagalain ang buot sang pamilya sang napatay nga katapo sang 94th Infantry Battalion sang Philippine Army sa engkwentro sa tunga sang rebelde nga grupo sa Sitio Kabugtong Batanggay Bantolinao, Manjuyod Negros Oriental sa asawa sang biktima.
Ini matapos nga ginadalok sang asawa ni Corporal Leoter Cagape ang bangkay sang biktima sa pamilya sini sa Sitio Bacolod Barangay Tacuyong Norte, Leon, Iloilo.
Sa interview sang Bombo Radyo kay Lilybeth Cagape, utod sang biktima, iya ginpahayag nga nagpadulong sila kaupod ang iya amay sa lugar sang asawa ni Cpl. Cagape nga si Hannah sa Tubuso, Negros Oriental agud nga hingyuon kuntani nga dal-on sa Iloilo ang bangkay sang soldado agud nga makita man sang ila nga iloy nga may yara na sang balatian.
Suno kay Lilybeth, madamo sang rason ang asawa sang biktima sa diin ginapahayag niya nga magasto kag malawig pa ang pagdala sang bangkay sa Iloilo.
Dugang pa sang utod, handa ang ila pamilya nga mag gasto sa pagpadala sang bangkay sa Leon apang nagapakatig-a gid ang asawa.
Isa pa sa ginakalainan sang buot sang pamilya ni Cpl. Cagape nga sa ila pagpadulong sa Negros Oriental, ang bangkay sang iya nga utod ang wala pa ginhaya sa balay sang iya nga asawa sa baylo sa tiya pa ni Hannah ginhamyang ang bangkay.
Nakit-an man nila nga wala sang kandila kag wala pa ginapangamuyuan ang bangkay sang iya nga utod nga daw kaangay nga ginapabay-an na lamang ini.
Wala man ginpahibalo sang asawa sang biktima sanday Lilybeth nga nakahanda na ang lubong sa diin may yara na ini sang petsa.
Nagapangayo lang kuntani ang pamilya ni Cpl . Cagape sa Leon, Iloilo sang konsiderasyon kag respeto.
Sa pagkamatuod, tuman nga nagahilibion ang amay ni Cpl. Cagape samtang nagahingyo sa asawa sang biktima.
