Ginhangkat sang detained-senator Leila De Lima ang Department of Foreign Affairs (DFA) nga imbitahon ang United Nations special rapporteurs kag pahanugutan nga mag-imbestiga sa pinatyanay nga natabo sa kampanya sang Duterte administration batuk sa iligal nga droga sa pungsod.
Suno kay De Lima, kinahanglan nga mangin tampad kag insakto ang rekord sang gobyerno sa numero sang pagpatay sa mga tawo sa drug war campaign.
Dugang pa sang natungdan, sa baylo nga paandaman ang mga kritiko sang administrasyon nga presohon, kinahanglan nga kabigon ang mga ini nga may ikasarang sa pagpasiguro nga may salabton ang administrasyon sa mga ginatawag nga unlawful deaths.
Nagakabalaka ang senadora nga daw kaangay nga ginapabay-an kag wala sang labot ang gobyerno sa padayon nga pinatyanay sa pungsod.
Nahibaluan nga 11 ka mga United Nations human rights experts ang magapatigayon sang international investigation may kaangtanan sa ‘unlawful deaths kag police killings’ sa drug war sang Pilipinas.
