ILOILO CITY– Ginpasalig ni Iloilo City Mayor Jerry Treñas nga mangin free kag livable city ang syudad sang Iloilo kadungan sang opisyal nga pagsugod sang ila pagpamuno subong nga adlaw.
Sa nangin speech ni Mayor Treñas pagkatapos sang ginhiwat nga thanksgiving mass sa San Jose Placer Parish Church sa Plaza Libertad, iya ginpahayag nga indi na siya maggamit sang pribado nga elevator sa baylo magagamit siya sang elevator nga ginagamit man sang tanan nga mga empleydo kag pumuluyo nga nagakadto sa city hall agud mahibaluan niya ang sitwasyon sang tagsa-tagsa kag kun kinahanglan ini nga ilisanm, nagakadapat nga mailisan para mas konbinyente sa tanan.
Suno kay Treñas, ipakansela niya ang mga overpriced nga mga salakyan kag iban pa nga ginbakal sang Iloilo City government sa nakaligad nga administrasyon.
Baklon naman suno sa iya ang tanan nga kinahanglanon sang Syudad sang Iloilo sa insakto nga presyo.
Ipakansela man niya ang combo ukon ang banda kag buffet sa Penthouse sa City hall tagsa ka Lunes .
Magluwas diri magapatigayun man siya sang tree planting agud makabulig sa pagtapna sang climate change bangud iya na-eksperyensyhan ang kainit sa syudad sang tion sang kampanya.
Madamo naman suno sa iya sang pagpanghangkat nga atubangon ang iya administrasyon apang iya ginpasalig nga mangin maayo siya nga alkalde para sa mga pumuluyo kag sa bug-os nga syudad sang Iloilo.
Ang iya mga plano suno sa alkalde ang para sa masunod nga henerasyon sang mga Ilonggo.
Nagapangabay man si Treñas sa tanan nga buligan siya sa iya handum nga mangin mauswagon ang syudad.
