Gin-athag sang Iloilo City Police Office (ICPO) kon ano ang ila katungdanan nahanungod sa mga Badjao nga nagalihu-liho sa palibot sang Syudad sang Iloilo.
Sa interview sang Bombo Radyo Iloilo kay Police Captain Shiela Mae Sangrines, tagpamaba sang (ICPO), iya ginpahayag nga kabahin ang ICPO sang composite team sang city government nga nagatalupangod sa mga Badjao upod sa City Social Welfare and Development Office (CSWDO), kag Public Safety and Transportation Management Office (PSTMO).
Suno Kay Capt. Sangrines, ang PSTMO ang may mayor nga katungdanan sa mga Badjao kag nagabulig lang ang kapulisan ilabi na kun may magluntad nga gamo nga naga-involve sa mga Badjao ukon kon may yara sila sang ginlapas nga layi.
Kun may involved naman nga mga menor-de-edad kaangay sang natabo nga pagtampa sang bata nga Badjao sa isa ka estudyante bangud wala siya ginhatagan sang kwarta, ang CSWDO na ang dapat mag-asikaso sini sa bulig sang PNP.
