Suportado sang Sangguniang Panlalawigan (SP) ang lihok ni Iloilo Governor Arthur Defensor Jr. nga pagdeklarar sang dengue outbreak sa Probinsya sang Iloilo.
Sa interview sang Bombo Radyo Iloilo kay 4th District Board Member Rolly Distura nga amo subong ang OIC Vice-Governor , iya ginpahayag nga magapatigayon sila sang pagsinapol sa SP agud mag-deliberate sa mangin augmentation sa executive order 016 sang gobernador bilang pagpahibalo sa publiko sang kalala sang problema sang dengue nga naglab-ot na sa 3,897 ka kaso kag 18 ang patay sa probinsya.
Naghingyo naman sang kooperasyon sang pumuluyo si Distura para batuan ang dengue.
Iya ginpahayag nga indi masarangan sang gobyerno nga tapnaon ang dengue kun wala sang bulig sang mga pumuluyo sa kabarangayan.
Gin-engganyo man niya ang mga pumuluyo nga boluntaryo nga magdonar sang dugo bilang bulig sa mga pasyente nga may dengue.
Nahibaluan nga dululungan nga nagpatigayon ang kabarangayan sa probinsya sang ‘Do Day Kontra Dengue Drive’ nga regular na nga aktibidad sa kada Sabado.
