Magapatigayon sang pagsinapol ang Philippine National Police (PNP) sa mga grupo nga maga-upod sa hublag protesta kadungan sang ika-apat nga State of the Nation Address (SONA) ni Presidente Rodrigo Duterte sa Hulyo 22.
Suno kay NCRPO Director Major Gen. Guillermo Eleazar, kabahin sang ila nga security preparations ang pagpakigsapol sa mga anti kag pro Duterte groups agud mahitso ang mga lugar nga pahamtangan sang programa.
Indi pagpahanugutan nga mag-upod sa isa lang ka lugar ang mga nasambit nga grupo bangud mahimo ini nga umpisahan sang gamo.
Dugang pa sang natungdan, siguraduhon sang PNP nga wala sang may mapa-untat nga mga hublag protesta apang nagakadapat man nga ila siguraduhon nga mangin matawhay kag hilway ang programa.
Gin-athag man ni Eleazar nga wala sang armas nga dal-on ang mga pulis magluwas lamang sa shields kag truncheon kag wala man sang mga containers kag barbed wires nga ipahamtang sa Batasan Road kag Commonwealth bilang pagpakita man sang goodwill sa mga raliyista.
Una na nga ginpahayag ni PNP Chief Gen. Oscar Albayalde nga yara sa 9,000 ka mga pulis ang iga-deploy sa lugar para sa SONA ni Presidente Duterte.
