BITOON JARO ILOILO CITY- Ginahibalo sang mga opisyal sang Barangay Bitoon Jaro Iloilo City ang identity sang duha ka mga nagkadto sa ila barangay agud kuntani pagpakig-istorya sa lider sang Katilingban sang Imol sa Syudad (Kaisog) nga si Mr. Wilfredo Panuela sa Brgy Bitoon Jaro Iloilo City.
Sa interview sang Bombo Radyo kay Punong Barangay Junalyn Provido, iya ginpahayag nga sang yara na sila sa barangay hall ila gin-usisa ang indentification card (ID) ni Art Diaz nga nagpakilala nga NBI agent kag ni Rey Gomez nga nagpakilala bilang agent sang Philippine Army.
Suno kay Provido, nagsanto man ang nawong sang duha sa pictures nga nakabutang sa ID.
Sang ila ginpamangkot sang tinutuyo suno kay Provido ang ginhambal lang sa ila amo nga makig-istorya ang mga ini kay Panuela.
Ginbuy-an nila suno kay Provido ang duha bangud wala man sang reklamo batok sa ila.
Nahibaluan nga may dala nga pusil ang duha kag suno sa mga pumuluyo lisensyado ang mga ini.
