ILOILO CITY – Napasaka na ang tatlo ka kaso nga gin-file batuk sa kontrobersyal nga si Police Master Sergeant Federico Macaya Jr.
Ini ang may kaangtanan sa pagsipa sang kudal kag pagpamahog sang pulis sa balay sang mag lolo nga sanday Pio Roy Conde, 23-anyos, ang apo ni retired Police Chief Master Sergeant Celso Conde, lunsay mga residente sang Barangay Sambag, Jaro, Iloilo City bangud sa pagreklamo sang asawa ni Macaya nga mabaho ang iti sang manok nga gina-amuma sang mag-lolo.
Sa interview sang Bombo Radyo kay Atty. Rex Marcus Sarabia, legal counsel ni Pio Roy Conde, iya ginpahayag nga kaso nga misconduct, conduct unbecoming of a police officer, kag oppression ang ginpasaka batuk kay Macaya.
Suno kay Atty. Sarabia, nagakahangawa ang kliyente niya bangud mahimo nga masobra pa ang himuon sa ila sang pulis bangud may yara ini sang pusil.
Gina-alegar nga kun mahubog si Macaya, masami nga nagataas ang iya tingog kag bayolente.
Nahibaluan nga si Macaya amo ang anay imbestigador sang Guimbal Municipal Police Station nga gindis-armahan, ginposasan, ginsipa, gintampa, ginsapote kag ginduplaan ni anay Iloilo 1st district Cong. Richard Garin samtang gintayaan naman ini sang armas sang iya amay nga si Guimbal Mayor Oscar Garin.
