MIAG-AO, ILOILO – Nagdepensa ang Philippine National Police sa ginapahayag pagkuha sang profile sang mga myembro sang All University of the Philippines Academic Employees Union- Iloilo Chapter.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya gin-athag nga wala sila nagmando nga kuhaan sang profile ang mga empleyado sang University of the Philippines Visayas sa Miag-ao Iloilo.
Suno kay Malong, posible nga ang nasambit nga lihok ang kabahin lang sang Police Community Relations sang Miag-ao Municipal Police Station sa pagpamuno sang ila hepe nga si Police Major Johnny Tumambing.
Samtang suno naman kay Police Col. Marlon Tayaba, director sang Iloilo Police Provincial Office, iya ginpahayag nga naka istorya na ini kay Police Major Tumambing kaangot sa nasambit nga lihok.
Suno kay Tayaba, may mga insidente sadto nga ginakaulamiran sang mga estudyante kag empleyado sang University of the Philippines Visayas sa Miag-ao.
Ginpahayag ni Tayaba nga ang nasambit nga lihok ang kabahin lang sang tikang sang Miag-ao Municipal Police Station agud maproteksyunan ang mga empleyado kag estudyante sang nasambit nga unibersidad.
Samtang, ginpahayag naman ni Police Major Johnny Tumambing, nga ‘in good faith’ ukon maayo ang katuyuan sang iya ginhimo nga pagkuha sang profile sang mga myembro sang All University of the Philippines Academic Employees Union- Iloilo Chapter.
Sa interview sang Bombo Radyo kay Tumambing, iya ginpahayag nga luyag lang sini nga mas mangin mahapos nga makakuha sang contact person sa tion nga may yara sang mga matabo nga insidente.
Suno kay Tumambing, bilang isa ka hepe, katungdanan sini nga hibaluon ang mga nagabug-os sa komunidad.
Indi naman kinahanglan suno kay Tumambing sang memorandum antes ini magkuha sang mga impormasyon sa mga tawo sa banwa nga iya nasakupan.
Gin-athag man ni Tayaba nga gin-una lang nila nga ginkuhaan sang profile ang mga empleyado sang University of the Philippines Visayas kag isunod naman sini ang Iloilo Science and Technology University.
Samtang, suno naman kay University of the Philippines Visayas Chancellor Ricardo Babaran indi na kinahanglan pa nga kuhaan sang profile ang ila mga empleyado bangud masarangan man nila nga depensehan kag hatagan sang seguridad ang ila mga empleyado kag estudyante sa sulod sang ila unibersidad.
