ILOILO CITY – Ginapasabat sang Police Regional Office (PRO) 6 ang duha ka pulis nga nadakpan sa aktu nga nagagamit sang cellphone samtang naga-duty sa Baldoza Terminal sa Lapaz, Iloilo City.
Ini matapos nga nakuhaan sang laragway sang concerned citizen sanday Patrolman Alban Diamante kag Patrolwoman Miraluna Castillo nga nagagamit sang cellphone samtang naga-duty.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office (PRO) 6, iya ginpahayag nga wala pa nakasabat ang duha ka pulis tuhoy sa nasambit nga reklamo.
Suno kay Malong, indi maathag kun bala matuod nga nagalingaw-lingaw lamang ang duha ka pulis santo sa ginpadala nga laragway sang concerned citizen.
Ang maathag lang suno kay Malong amo nga ginadumili-an ang tanan nga pulis nga maggamit sang cellphone kun indi man lang importante samtang naga-duty.
Magluwas sa paggamit sang cellphone, ginadumili-an man ang mga pulis nga magpahubog kag magtulog kun duty hours.
Mahimo nga pahalinon ukon kuhaan sang benepisyo ang mga pulis nga magalapas sa nasambit nga pagsulundan.
