BAROTAC NUEVO, ILOILO – Desidido nga magpasaka sang kaso ang pamilya sang 13 anyos nga dalagita nga gingang rape sang 5 ka mga lalaki kag gikuhaan pa sang sex video sa Poblacion Barotac Nuevo, Iloilo.
Sa interview sang Bombo Radyo kay Tatay Junior, amay sang biktima nga si Ivy, 13 anyos kag grade 8 student sang Barotac Nuevo National Comprehensive High School, iya ginpahayag nga kaso nga rape ang ipasaka sa mga suspek nga ginalakipan sang 19 anyos nga tumandok sang Brgy. Poblacion, 17 anyos nga tumandok sang Brgy. Guintas, 15 anyos kag 16 anyos nga tumandok sang Brgy Tabuc Suba kag 16 anyos nga tumandok sang Cabilauan.
Suno kay Tatay Junior, ikatatlo si Ivy sa 10 sini ka mga kabataan.
Mismo ang lola sang biktima ang nagpabalo nga may sex video ang dalagita.
Apang suno sa amay, nahadlok ang iya anak nga magpanugid bangud ginsapote kag ginpahog ini sang isa sa mga nobya sang suspek.
Nagalalain naman ang amay bangud ginpalapta pa sa Facebook messenger ang sex video sang iya anak.
Nahibaluan nga nag ako mismo ang isa sa mga suspek nga ginbulus-bulusan nila sa paghimulos ang biktima.
