ILOILO CITY – Mahimo na nga mahibaluan ang resulta sang imbestigasyon sa tatlo ka mga pulis nga ginapahayag nagmaoy kag wala nagbayad sang bill sa isa ka disco bar and restaurant sa JM Basa St. Iloilo City Proper sa masunod nga semana.
Ang tatlo ka mga pulis ang ginkilala nga sanday Police Chief Master Sergeant Jose Dinggal, Police Senior Master Sergeant Fernil Mark Mallorca kag Police Staff Sergeant Ralph Mabuque.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga padayon nga gina-imbestigahan sang Regional Investigation and Detective Management Division kun bala yara gid man ang presensya sang tatlo ka mga pulis nga ginapahayag nagmaoy kag wala nagbayad sang bill sa isa ka disco bar and restaurant.
Suno kay Malong, matapos ang pre-charged investigation, i-diretso ini gilayon sa summary hearing sa diin mahibaluan ang silot nga pangatubangon sang mga pulis.
Dugang pa sang natungdan, nagtuga man sa mahinay nga imbestigasyon ang guba nga Closed Circuit Television sa etablisimento nga makabulig man kuntani sa pagsolbar sa imbestigasyon.
