Kinahanglan nga presentable ang mga tawo nga magapadulong sa Iloilo City Police Office, Iloilo Police Provincial Office, Police Regional Office 6, kag sa Camp Martin Delgado.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ginadumilian ang pagsuksok sang mga panapton kaangay sang sando, shorts, sports attire, sleeveless kag tsinelas.
Gin-athag ni Malong nga indi kabahin ang mga police stations sa pagdumili sang mga nasambit nga panapton.
Samtang sa bahin naman ni Police Captain Shella Mae Sangrines, tagpamaba sang loilo City Police Office, iya ginpahayag nga ang mga headquarters sang kapulisan ang ginakabig nga public office kaangay sang mga buluthuan.
Suno kay Sangrines, ang mga nasambit nga opisina ang masami nga ginakadtoan sang publiko agud nga makig-transaksyon kaangay sang pagkuha sang police clearance sa diin kinahanglan nga pormal ang ginasuksok sang tawo.
Tinutuyo sang sini nga lihok amo nga ipalab-ot sa mga pumuluyo nga ang mga opisina sang Philippine National Police ang isa ka propesyonal nga opisina.
