ILOILO CITY – Igalunsyar sang Iloilo City Government sa Hulyo 20 ang simultaneous misting sa bug-os nga syudad sang Iloilo agud matapna ang pagduging sang Dengue Hemmorhagic Fever.
Sa interview sang Bombo Radyo kay Iloilo City Councilor Allan Zaldivar, chairman sang Committee on Health sa konseho, iya ginpahayag nga 5:00 sa kaagahon sa Hulyo 20, Sabado, magabagting ang lingganay sang mga simbahan kag magahuni ang sirena sang tagsa ka Fire kag Sub Station sa syudad sang Iloilo.
Ang pagbagting sang lingganay kag ang paghuni sang sirena sang Bureau of Fire Protection ang patimaan nga maga-umpisa na ang dululungan nga misting ukon pag-spray sang bulong kag ang pagpaninlo sa palibot agud nga madula ang lamok nga nagadala sang balati-an.
Ang launching sang Simultaneous Do Day ang patigayunon sa Brgy. Calumpang, Molo.
Suno kay Zaldivar, misting na lang ang patigayunon bangud nga ang fogging ang nagatuga sang aso kag mahimo nga makapadugang sang balati-an ilabi sa mga may yara sang hapo.
