ILOILO CITY – Nagpromisa na ang mga Private Hospital sa syudad sang Iloilo nga batunon ang mga pasyente nga may Dengue Hemorrhagic Fever nga indi na matatapan sang mga Government Hospital sa probinsya sang Iloilo.
Sa interview sang Bombo Radyo kay Department of Health 6 Regional Director Dr. Marlyn Convocar, iya ginpahayag nga ang 12 ka mga district hospital sa probinsya sang Iloilo ang indi na makasarang nga magbaton sang dugang nga pasyente bangud nga nagasulubra na ang pasyente bangud sa Dengue.
Suno kay Convocar, humalin sang Enero tubtub Hulyo subong nga tuig, naglab-ot na sa 15,746 ang kaso sang Dnegue sa Western Visayas diin 87 na ang patay.
Ginpahayag ni Convocar nga tuman na ka gutok ang mga district hospital rason nga ang Department of Health sa bulig sang partner government agencies, ang magabulig sa indigents ukon pigado nga mga pasyente.
Ang mga pigado ang indi na magpang alang-alang nga magpa-admit sa pribado nga hospital bangud nga may yara sang ayuda nga igahatag ang Department of Health.
Ang kinahanglan lang suno sa natungdan amo ang Memorandum of Agreement, clearance gikan sa Govenrment Hospital kag iban pa nga rekisitos.
