CARLES, ILOILO-Patay ang isa ka 15- anyos nga dalagita matapos naghikog bangud ginapahayag na broken- hearted sa banwa sang Carles, Iloilo.
Ang biktima ginkilala nga si alyas ‘RC’, pumuluyo sang Brgy. Talingting, Carles, Iloilo, kag estudyante sang Calantihan National High School sa Balasan, Iloilo.
Sa interview sang Bombo Radyo Iloilo kay Staff Sergeant Christopher Balaan, imbestigador sang Carles Municipal Police Station, iya ginpahayag nga nasapwan nalang sang iya manghod ang biktima nga nagabitay sa kisame kag may higot sang habol ang liog sa sulod sang iya kwarto sa ila balay sa People’s Village, Brgy. Nalumsan, Carles, Iloilo.
Suno sa imbestigador, gintuad ni Jesusalem Nava, kasilingan sang biktima nga antes ini nasapwan nga naghikog, nakamitlang si alyas RC nga magakumiter ini sang suicide kun bulagan ini sang iya nobyo.
Padayon naman ang imbestigasyon sang otoridad agud mahibaluan ang matuod nga rason sang pagpanginmatay sang dalagita.
