ILOILO CITY – Gilayon nga ginmando sang pamunuan sang Police Regional Office VI, ang pag relieved sa pwesto sang duha ka mga hubog nga pulis sa Pototan Municipal Police Station nga nagpalupok sang armas kag nagbato sa ila hepe.
Suno kay PBGen. Rene Pamuspusan, regional director sang Police Regional Office VI, wala sini gina tolerar ang ginhimo nanday Patrolman Joerick Ace Ilisan kag Police Corporal Esil Peñarubia nga pagbato sa ila hepe nga si Police Major Ronnie Brillo.
Ginmando man ni Pamuspusan ang pagpasaka sang kaso administratibo kag criminal batok sa duha ka pulis.
Magluwas sini, nagmando man si Pamuspusan sa Internal Affairs Service 6 sa pag imbestigar sa kaso administratibo.
Ginpasalig man ni Pamuspusan nga personal sini nga tutukan ang kaso sang duha ka pulis tubtub mapahalin ang mga ini sa serbisyo.
Pasakaan man sang kaso ang mga team leader kag squad mates sang duha ka mga pulis bangud sa indi maayo nga pag supervise sa ila squadmates ukon comrade.
Liwat nga ginpaathag ni Pamuspusan sa iya pasalig nga tinluan ang hanay sang pulisya.
