POTOTAN, ILOILO – Mahimo nga mapahalin sa pwesto ang duha ka pulis nga nagpahubog kag nagpahog nga patyon ang ila hepe sa Pototan, Iloilo.
Ini ang may kaangtanan sa pagpahubog kag pagmaoy nanday Patrolman Joerick Ace Ilisan kag Police Corporal Esil Peñarubia sang Pototan Municipal Police Station.
Sa interview sang Bombo Radyo kay Iloilo Police Provincial Office Director Police Col. Marlon Tayaba, iya ginpahayag nga dismissal from service ang mahimo nga igasilot batok sa duha ka mga pulis.
May kaangtanan sa kaso administratibo batok kanday Ilisan kag Peñarubia, ginpahayag ni Tayaba nga ila na ini nga ginpasaka sa Office of the Prosecutor.
Ginpahayag ni Tayaba nga iya na nga na-istorya ang duha ka pulis apang lunsay man nagpanginwala tuhoy sa ila nahimo nga kontrobersiya.
Sa bahin naman sa pagpasaka sang kaso kriminal batok sa duha ka pulis, ginpahayag ni Tayaba nga nakadepende pa ini sa ila imbestigasyon.
Makapabug-at sa kaso suno sa natungdan amo ang resulta sang paraffin test, drug test, psychiatric test, alcohol test kag cross matching test.
Samtang, ginalauman nga igapaguwa sa madali nga tion ang resulta sang paraffin test, drug test, psychiatric test, alcohol test, gunpowder residue kag cross matching test batok kanday Ilisan kag Peñarubia.
Sa interview sang Bombo Radyo kay Police Col. Enrique Ancheta, pinuno sang Regional Crime Laboratory Examination Office, iya ginpahayag nga padayon ang ginapatigayon nga imbestigasyon batok sa duha ka pulis.
Suno kay Ancheta, bisan nga si Ilisan lang ang nagpalupok apang maulamid man sa gihapon sa paraffin test kag gunpowder residue si Peñarubia.
Ginpahayag ni Ancheta nga importante nga mapaidalom sa cross matching test ang service firearm sang duha ka pulis agud nga makumpirma kun sin-o sa ila ang nagpalupok sang armas-luthang.
