Photo Ctto
BUENAVISTA, GUIMARAS – Wala na natabangan pa ang driver sang van sang nagbungguanay ang mixer kag sang nasambit nga salakyan sa San Isidro, Buenavista, Guimaras.
Ang biktima ang ginkilala nga si Kevin Intrevention, 27 anyos sang Purok 3 McLain, Buenavista samtang ang driver sang cement mixer amo si Ronald Menor, 33 anyos sang Alaguisoc, Jordan Guimaras.
Sa interview sang Bombo Radyo kay Jerry Villaroel, nakakita sa aksidente, iya ginpahayag nga nadugayan pa nga makuha sang mga otoridad si Intrevention bangud naipit ang tiil sang biktima sa diin gupi ang iya ginamaneho nga van.
Samtang sa bahin naman ni Pol. Master Sergeant Charlie Haro, imbestigador sang Buenavista Municipal Police Station, iya ginpahayag nga ginguba pa sang mga kapulisan ang van agud lamang nga matigayon nga makuha ang biktima.
Suno kay Haro, naglapaw sa lane ang van kag nakabunggo sa mixer nga na sumalang.
Padulong kuntani sa Jordan ang van samtang padulong naman sa San Isidro Buenavista ang cement mixer.
Gintinguhaan pa nga madala sa ospital ang biktima apang gindeklara ini nga dead on arrival.
Sa subong, preso na ang driver sang cement mixer.
Nahibaluan nga natabo ang aksidente kaina, Hulyo 18 sang udto.
