Nagdangat na sa apat ang patay samtang masobra 20 ka mga barangay ang nalumos sa baha sa Luzon kag Visayas tuga sang mabaskog nga ulan sang bagyo Falcon nga ginpabaskog pa sang southwest monsoon rains ukon habagat.
Suno kay Antonio Macalan, Cagayan Provincial Disaster chief, lunsay pagkalunod ang ginkamatay sang duha ka mga biktima nagikan sa mga lugar sang Lallo kag Gattaran sa Cagayan.
Samtang sa Zambales, may duha man ka mga nalunod bangud ginapahayag nga hubog ang mga ini kag gin-anod sang balod sa baybayon.
Padayon pa nga gina-imbestigahan sang Office of Civil Defense 3 ang report kag pangalan sang mga biktima.
Sa pangkabug-osan, naapektuhan sang bagyo ang ginabanta 391 ka mga pamilya sa 12 ka mga barangay sa Northern Luzon nga nagpabaha man sa lima ka mga barangay sa Oriental Mindoro kag Albay.
Base naman sa National Disaster Risk Reduction and Management Council, siyam nga dalan kg taytay ang naapektuhan sa Cordillera Administrative Region kag Region 1.
Nagtuga man ini sang landslide sa Libon, Albay kag San Gabriel, La Union.
Ginbaha man ang mga barangay sa Luzon kag Visayas kaangay sang Aklan ,Albay kag Iloilo City.
Samtang, padayon naman nga ginabantayan ang pagbaskog sang low pressure area nga yara sa 250 kilometros sa nakatundan naaminhan nakatundan sang Sinait, Ilocos Sur.
Ginalauman nga mangin bagyo ini kag pagatawgon nga “Goring”.
