Nagadangat sa P36,000 ang piyansa sa kaso nga ginpasaka sang mister sa iya misis kag kerido nga nadakpan sa sulod sang Katrina lodge sa Lapaz, Iloilo City.
Ini kasunod sang pormal na nga pagpasaka sang kaso nga adultery sa Iloilo City Prosecutor Office sang mister nga si Stephen, 32, sang Zone 2, San Juan, Molo,Iloilo City.
Sa interview sang Bombo Radyo kay Chief Master Sergeant Jerwin Servano, imbestigador sang Lapaz Police Station, iya ginpahayag nga ang nasambit nga kantidad ang bayaran sang tagsa ka mga akusado nga sanday Sharon, 32, sang Zone 2, San Juan, Molo, Iloilo City kag kerido sini nga si Jevy Suson,32, sang Calaparan, Arevalo, Iloilo City.
Suno kay Servano, sa tion nga makabayad sang piyansa, gilayon man nga hatagan sang temporaryo nga kahilwayan ang misis kag kerido sini.
Samtang, naghatag sang tagsa-tagsa nila ka mga reaksyon ang mga himata sang misis kag iya kerido nga nadakpan sang mister nga naga-updanay sa Katrina Lodge sa Lapaz, Iloilo City.
Sa interview sang Bombo Radyo kay Wilson, amay sang kerido nga si Jevy Suson, iya ginpahayag nga indi ini makapati nga nangin kerido ang iya anak ni Sharon.
Suno sa amay, may ka live-in partner si Jevy kag may yara man sila sang isa ka anak gani wala gid ini nagdumdom nga makigrelasyon ini sa iban nga babaye.
Suno naman kay Claudia, iloy sang mister nga si Stephen, kinahanglan nga mahatagan sang hustisya ang pagguba ni Sharon sa morale sang iya anak.
Ginpahayag man niya nga samtang nagapadayon ang kaso nga adultery nga ginpasaka ni Stephen batok kanday Sharon kag Jevy, siya ang magatatap sa tatlo ka kabataan sang mag-asawa.
Samtang, gin-ako naman sang mister nga si Stephen nga naluoy man siya sa iya misis nga si Sharon apang nanindugan siya nga kinahanglan sini manabat sa ginhimo nga pagluib sa iya.
Suno pa kay Stephen, magatinguha siya nga mangabuhi sang normal kag buhion ang ila tatlo ka kabataan nga nagaedad 14 anyos, 13 anyos, kag walo ka tuig.
