ILOILO CITY – Madamu sang ginakabalak-an ang mga pribado nga hospital sa syudad sang Iloilo tuhoy sa nagadamu nga pasyente bangud sa Dengue Hemorrhagic Fever.
Ini ang kasunod sang pagsinapol nga ginpatawag ni Iloilo City Councilor Allan Zaldivar, chairman sang Committee on Health sa konseho, kaupod ang mga tiglawas sang mga private hospital.
Sa interview sang Bombo Radyo kay Zaldivar, iya ginpahayag nga ginkasugtan sa pagsinapol nga dapat batunon sang mga private hospital ang pasyente nga naghalin sa syudad ukon probinsya man sang Iloilo.
Suno kay Zaldivar, magluwas sa discount, ang importante amo ang kalidad sang serbisyo nga mahatag sang mga private hospital sa pasyente.
Kadungan sang pagsinapol, nagpasalig ang tagdumalahan sang tagsa ka pribado nga hopital nga ila batunon ang mga pasyente nga may yara sang Dengue.
Ugaling suno kay Zaldivar, may pila lang ka mga problema ang mga pribado nga hospital kasubong sang kakulang sang manpower ukon hospital staff kag ang kakulang sang hospital bed.
May kaangtanan diri, ginpahayag sang konsehal nga bilang chairman sang Committee on Health, iya nga tinguhaan nga mapasangkad ang tagsa ka mga barangay kag district health centers sa syudad agud nga indi mag-alalawas ang pasyente sa mga hospital.
