ILOILO CITY – Madali nga magkambyo ang panindugan sang Philippine National Police para lang nga pangapinan ang administrasyon kun war on drugs ang pagahambalan.
Ini ang reaksyon ni Msgr. Meliton Oso, director sang Jaro Archdiocesan Social Action Center, tuhoy sa pagpasaka sang Philipine National Police sang sedition kag iban pa nga kaso batok sa opposition leaders sa pagpanguna ni Vice President Leni Robedo kag naulamid man ang 3 ka obispo kag 3 ka pari matapos ang pagkambyo sang pahayag ni Peter Joemil Advincula alyas Bikoy nga amo ang sa likod sang ‘Ang Totoong Narcolist’ videos.
Sa interview sang Bombo Radyo kay Msgr. Oso, iya ginpahayag nga makabig nga pagpang-ipit kag pagpahipos sa mga kritiko ang ginahimu sang Philippine National Police.
Suno kay Msgr. Oso, sang una nga ginhingadlan ni Bikoy nga naulamid sa illegal drugs ang pamilya ni Presidente Rodrigo Duterte, kasubong nga wala man sang aktu ang otoridad apang sang nagkambyo sang pahayag si Bikoy kag gintudlo ang opposition leaders, kasubong nga gindali-dali ang pagpasaka sang kaso.
Sa linibo nga biktima sang Extra Judicial Killings, ginpahayag sang natungdan nga nagakadapat nga mangin hayag ang Philippine National Police tuhoy sa matuod nga numero sang mga nagkalamatay.
Sa pihak sini, nagapati si Msgr. Oso nga magaguwa gid sa ulihi kun ano ang kamatuoran.
