LAS VEGAS, NEVADA – Handa na si 8-Division World Champion Manny Pacquiao nga patilawon sang mabaskog kag masakit nga sumbag ang American boxer nga si Keith Thurman sa ila WBA (Super) welterweight championship buwas nga adlaw, Hulyo 21.
Sa interview sang Bombo Radyo kay Bombo International Correspondent Ponce Melo, direkta sa Estados Unidos, iya ginpahayag nga pagkatapos sang weigh-in sang duha ka boksidor kaina sang kaagahon, gilayon nga balik sa kinaandan ang gawi ni Pacquiao.
Suno kay Melo, balik sa pagkaon sang mga paborito nga pagkaon si Pacquiao kag nagpatigayon sang bible study kaupod ang mga suod nga abyan kag himata.
Ginpahayag ni Melo nga yara sa Estados Unidos ang mga kabataan, tiayon kag iloy ni Pacquaio bilang pagsuporta sa 8Division World Champion.
Ang duha naman ka mga utod ni Pacquiao nga lunsay mga pulitiko ang nagpauli sa Pilipinas agud nga magtambong sa ika-apat nga State of the Nation Address (SONA) ni Presidente Rodrigo Duterte sa Lunes, Hulyo 22.
Nag-abot naman sa Estados Unidos agud magsaksi sa boxing fight ni Pacquiao ang mga kilala nga personalidad kasubong sang pulitiko nga si Chavit Singson kag mga celebrity nga sanday Andrew E. kag Cesar Montano.
Ginpahayag ni Melo nga magapahuway si Pacquiao sa mga nabilin nga inoras bag-o ang championship fight batok kay Thurman.
