TUBUNGAN, ILOILO – Pilason nga ginpadangat sa ospital ang chainsaw operator matapos nga ginbuno sang mag-utod sa Igpaho, Tubungan, Iloilo.
Ang biktima ang ginkilala nga si Nelson Calibayan, 48 anyos samtang ang mga suspek naman nga mag-utod amo sanday Jonel kag Jonald Ilama lunsay residente sang nasambit nga barangay.
Sa interview sang Bombo Radyo kay Pol. Capt. Eleaza Clemacosa, hepe sang Tubungan Municipal Police Station, iya ginpahayag nga na may okasyon sa balay nanday Ilama kag na-irita ang mga ini bangud sa magahod nga chainsaw nga gina-kaayo ni Calibayan rason nga ila ini ginbuno.
Suno kay Clemacosa, tupad balay lamang ang mag-utod nga Ilama kag si Calibayan.
Dugang pa sang natungdan, pilas sa nawala nga bahin sang tyan ang naangkon ni Calibayan.
Sa subong, padayon pa nga ginapangita sang mga kapulisan ang duha ka mga suspek bangud gilayon ang mga ini nalagyo.
