ILOILO CITY – Tuman ang pagpasalamat ni Iloilo City Councilor Alan Zaldivar sa tanan nga nagbuylog ilabi na sa Bombo Radyo Iloilo bilang media partner sa ginpatigayon nga ‘Ugsaran tinlu-an para balati-an malikawan’ ukon ang simultaneous citywide clean-up drive sang syudad sang Iloilo.
Sa interview sang Bombo Radyo kay Konsehal Zaldivar, chairman sang Committee on Health sa konseho, iya ginpahayag nga ang pagpaninlo indi lamang matapos kahapon nga adlaw bangud nagakadapat nga sa tagsa ka adlaw, magpaninlo ang tanan nga pumuluyo sa ila nga ugsaran.
Suno kay Zaldivar, wala napaslawan ang city government nga malab-ot ang tinutuyo nga malimpyuhan ang 180 ka mga barangay sa syudad sa diin may mga monitoring team nga naglibot.
Nahibaluan nga kabahin sa mga nagpakigbahin sa nasambit nga aktibidad amo ang Bureau of Jail Management and Penology, Philippine National Police, Philippine Army, Philippine Navy, Philippine Coast Guard kag nga Non-Government Organization.
