ILOILO CITY – Gindeklara ni Iloilo City Mayor Jerry Trenas ang outbreak sang dengue sa syudad sang Iloilo pinaagi sa executive order 023.
Sa exclusive interview sang Bombo Radyo kay Mayor Trenas, iya ginphayag nga nangin basehan sa pagdeklara sang dengue outbreak amo nga naglab-ot na sa epidemic and alert threshold ang kaso sang dengue sa syudad.
Nagtaas sa 416.7% ang kaso sang dengue umpisa sa bulan sang Enero 2019.
Suno kay Trenas, maka-alarma ang padayon ang pagtaas sang kaso sang dengue sa diin tagsa ka adlaw, masobra tatlo ka mga biktima ang naga-positibo nga may dengue hemorrhagic fever.
Dugang pa sang natungdan, mahimo nga makuha ang dengue sa balay, opisina ukon eskwlehan.
Nagpasalig man ang alkalde nga magahinmo sang solusyon ukon aksyon ang city government agud matapna ang nasambit nga balatian.
Aprubado naman ang pondo nga natalana para sa dengue nga gamiton sa pagbakal sang kemikal nga i-spray sa lamok kag iban nga mga equipment.
Sa subong, yara na sa walo ang patay kag masobra 700 na ang kaso sang dengue sa syudad.
