ILOILO CITY- Nagakadapat suno sa isa ka kongresista nga kaayuhon anay ang pila ka mga aspeto sa polisa sang gobyerno antes ibalik ang death Penalty sa Pilipinas.
Sa Interview sang Bombo Radyo kay Iloilo 3rd District Congressman Lorenz ‘Nonoy’ Defensor, iya ginpahayag nga dako nga isyu ang death penalty kag may mga bagay nga dapat ikonsidera kaangay sang pagsolbar sang kurapsyon sa hanay sang kapulisan, prosekusyon kag husgado.Samtang isa naman ka pagpanghangkat para sa kongreso ang pagpabilin sang independence.
Nagakadapat suno sa mamalidha nga indi magpadikta ang Kamara kay Presidente Rodrigo Duterte.
Sa pihak nga bahin ginaduso man ni Defensor ang mandatory driver education agud mapaintindi sa tagsa ka mga driver ang layi sa dalanon agud mangin ihemplo man para sa iban.
Ang re-education sang mga drivers ang himuon sa tion nga magrenew sang lisensya, magparehistro kag magparview sang prangkisa sang salakyan.
Kun ang isa ka driver ang nagamaneho sang pampubliko nga bus kag jeep libre ang re-education, kun nagadrive naman sa pribado nga kumpaniya kag sa gobyerno ang kumpanya kag gobyerno ang magabayad samtang kun nagatrabaho naman sa pribado nga tawo ang employer ang magabayad sang re-education.
Nagalaum naman si Defensor nga ang nasambit nga hagna ang mangin solusyon sa problema sa trapiko.
