ILOILO – Mahimo pa nga madugangan ang mga nagkalamatay bangud sa Dengue Hemorrhagic Fever sa probinsya sang Iloilo.
Sa interview sang Bombo Radyo kay Dr. Patrica Grace Trabado, Provincial Health Officer 2 sang Provincial Health Office, iya ginpahayag nga sa pinaka-ulihi nga data, naglab-ot na sa 23 ang mga nagkalamatay bangud sa Dengue.
Suno kay Dr. Trabado, sa tagsa ka Huwebes, may yara sang additional nga data nga ginabaton ang Provincial Health Office rason nga mahimo pa nga magtaas ang kaso sang Dengue kag ang mga nagkalamatay bangud sa nasambit nga balati-an.
Ginpahayag ni Dr. Trabado nga wala pa nadugang sa casualty ang napatay sa banwa sang Janiuay kag Anilao bangud nga wala pa nabaton sang Provincial Health Office ang death certificate sang duha ka mga biktima.
Ang kumpirmado lang sa subong suno sa natungdan amo nga ang Concepcion ang may 4 ka patay, Pototan nga may 3, Maasian, Pavia, Bingawan kag Banate nga may tag duha, Passi City, Sara, Lambunao, Sta. Barbara, Cabatuan, Dingle, Dueñas kag New Lucena nga may tag-isa ka patay.
