ILOILO – Nagakinahanglan sang dugang nga pagtuon kag pagpanalawsaw bag-o gamiton liwat ang kontrobersyal nga Dengvaxia vaccine.
Ini ang reaksyon ni Department of Health Sec. Francisco Duque III sa panugyan ni Iloilo 1st District Congresswoman Janette Garin nga nagakadapat nga mangin available ang nasambit nga bakuna may kaangtanan sa Dengue outbreak sa syudad kag probinsya sang Iloilo.
Ginpahayag ni Duque sa Bombo Radyo nga wala man sang malain sa panugyan ni Garin bangud nga magluwas sa Dengue, ang kagat sang lamok ang makatuga man sang Zika, Chikungunya kag Malaria.
Kadungan sang pagbisita ni Duque sa mga hospital sa syudad kag probinsya sang Iloilo, nakita sang tiglikum nga nagagutok ang mga pasyente.
Suno kay Duque, bisan nga kulang sa gamit medikal ang mga hospital apang makabig naman ini nga hydration station sa diin ginahatagan sang intravenous fluid ang mga pasyente nga may yara sang Dengue.
Ang nasambit nga fluid suno kay Duque ang makapahagan-hagan sang epekto sang Dengue sa isa ka tawo.
Sa pihak sini, nagpahayag naman si Duque nga pagatutukan sang Department of Health ang pagpasangkad sang mga district hospital agud nga indi maggutok ang pasyente ilabi na kun may outbeak sang balati-an.
