ILOILO – Nagakabalaka ang mga shrimp farmers sa probinsya sang Iloilo bangud sa virus nga naga-atake sa mga cultured shrimp.
Sa interview sang Bombo Radyo kay Christian Cordero sang Southeast Asian Fisheries Development Center (SEAFDEC) aquaculture department, iya ginpahayag nga ang white spot virus ang naga-atake sa ginpang culture nga mga pasayan.
Ang nasambit nga virus suno kay Cordero ang nakuha gikan sa mga ginpang-import nga stocks sang pasayan gikan sa iban nga pungsod.
Pahayag ni Cordero, kun naapektuhan sang white spot virus ang gin-culture nga pasayan, may posibilidad ini nga mapatay sa sulod sang isa ka semana ukon sa pila lang ka adlaw.
Indi man madali-dali nga madula ang nasambit nga virus bangud nga yara ini sa tubig.
Bilang kabahin sa paghatag sang solusyon sa nasambit nga problema suno kay Cordero, ila ginaseparar ang mga pasayan nga may white spot virus sa indi apektado.
