ILOILO CITY – Wala pa nahibalu-an kun sa diin na subong ang lalaki nga ginatudlo nga nagpalupok sang armas-luthang sa Smallville Complex sa Mandurriao, Iloilo City sang Hulyo 20.
Ini matapos nga natumod na sang otoridad ang identity sang nasambit nga lalaki nga gikilala nga si Glen Cordero sang Brgy. Pali Benedicto, Madurriao, Iloilo City.
Sa interview sang Bombo Radyo kay Police Major Marlon Valencia, hepe sang Mandurriao Police Station, iya ginpahayag nga natumod si Cordero paagi sa kuha sang Closed Circuit Television camera kag mismo ang mga pulis nga nagresponde sa kinagamo amo ang nakakita sang hitsura sang nasambit nga lalaki.
Ginpahayag ni Valencia nga natukiban nga ang mga persona nga nagpanggamo sa Smallville Complex ang nagsakay sa pick-up kag nagpadulong sa balay ni Cordero agud nga magpanago.
Sa subong, ginahulat na lang nila suno sa natungdan ang pagpaguwa sang warrant of arrest matapos nga napasaka na ang kaso nga alarm and scandal with the use of firearm kag resisting arrest.
