Nagpanugyan ang National Disaster Risk Reduction and Management Council sa local nga gobyerno sang Batanes nga magdeklara sang state of calamity matapos ang pagtay-og sang linog nga nagpatay sa walo ka tawo sa Itbayat.
Suno kay National Disaster Risk Reduction and Management Council Executive Director Ricardo Jalad, sa tion nga magdeklara sang state of calamity ang lugar, magabulig man ang mga iban pa nga ahensya sang gobyerno para sa mga apektado sang linog.
Una nga nabatyagan ang magnitude 5.4 nga linog alas-4 sang kaagahon sang Hulyo 27 samtang ang ika-duha nga linog ang may magnitude 5.9 nga nabatyagan alas-7:38 sang aga sang amo man nga adlaw.
May yara pa sang aftershock nga nagluntad 9:24 sang aga sang Hulyo 27 nga may kabaskugon nga magnitude 5.4.
Nagdangat naman sa 100 ang pilason samtang 2,963 ka tawo ukon 911 ka pamilya ang naapektuhan sang linog nga nag-igo sa Itbayat, Batanes.
Padayon sa gihapon nga nagaluntad ang mga aftershocks sa lugar.
Suno naman sa Philippine Institute of Volcanology and Seismology, siyam ka mga aftershocks ang na rekord kahapon sa diin ang pinakamabaskog amo ang magnitude 3.5.
Humalin Sabado nga adlaw, 200 na ka mga aftershocks ang narekod sang Phivolcs.
Bangud sa mga aftershock, nagtuga ini sang madamo nga rockslide sa mga kabukiran sang Itbayat.
Samtang suno kay Itbayat Mayor Raul De Sagon, nagtuga sang madamo pa nga mga pagkaguba sa mga balay kag establisimyento bangud sa mga aftershock.
Napilitan ang mga residente nga magpabilin sa guwa sang ila balay bangud sa kahangawa nga mag-collapse ini.
Ang mga pilason naman ang nagapabilin sa plaza agud nga madapatan sang nagakaigo nga pagbulong.
Pahayag naman ni Batanes Governor Marilou Cayco nga madamo sa mga balay nga nagguba ang 100 years na ang nakaligad sang ini ang gintukod nga nangin kabahin na sang kasaysayan sang Batanes.
Padayon naman ang pagpadala sang tubig, pagkaon kag tent sang gobyerno sa Itbayat pinaagi sang Philippine Airforce samtang may yara man sang mga pagkaon nga wala pa mapadala nagikan sa Basco, Batanes.
