Nag-sungka sa Philippine National Police Criminal Investigation and Detection Group (PNP-CIDG) sa Camp Crame ang lalaki nga nagpakilala bilang ‘Bikoy’ sa anti-Duterte series videos nga “Ang Totoong Narcolist” bangud sa ginserbe nga warrant of arrest tungod sa kaso nga cyberlibel.
Ini amo si Peter Joemel Advincula, ang lalaki nga gina-alegar amo ang hooded narrator sa kontrobersyal nga video nga nagapakalain kay Presidente Rodrigo Duterte kag sa tanan nga malapit sa iya.
Suno kay Police Lieutenant Colonel Arnold Ibay, hepe sang CIDG National Capital Region, boluntaryo nga nagpadulong si Advincula sa ila talatapan.
May warrant of arrest si Advincula para sa kaso nga cyberlibel nga ginpasaka sang businessman nga si Zaldy Co.
Isa si Co sa gin-ulamid sa “Ang Totoong Narcolist” videos ni Advincula sa social media.
Suno kay Police Major Benigno Meneses, hepe sang Investigation Section sang CIDG-NCR, Hulyo 11 sang naguwa ang warrant of arrest batuk kay Advincula nagikan sa Legazpi City Regional Trial Court Branch 5.
Dugang pa ni Meneses, nag-agi sa booking procedure antes gindala sa detention cell si Advincula.
Sa subong, preso na sa detention facility sa CIDG-NCR si Advincula.
Apang mahimo sa gihapon nga makaguwa temporaryo sa presohan ini kun makapiyansa balor P10,000.
