ILOILO CITY- Tuman ka damo ang mga road obstructions sa Alalasan, Lapuz rason kun ngaa ini ang pilot barangay sa Oplan Hawan ukon ang full clearing operation sa mga dalanon sa Syudad sang Iloilo bilang pagtuman sa mando ni Presidente Duterte nga ibalik ang mga dalanon sa mga motorista.
Sa interview sang Bombo Radyo kay Mr. Boyet Rico, Executive Assistant for Barangay Affairs, iya ginpahayag nga isa ang Alalasan sa may madugay na nga problema sa malala nga mga obstructions nga nagapabudlay sa mga motorista nga nagalabay sa lugar.
Ginkalipay naman ni Rico ang kooperasyon sang mga barangay officials nga nagbulig sa nasambit nga operasyon.
Magluwas sa Alalasan, ginpatigayon man ang clearing operation sa Aguinaldo, Lapaz kag Jalandoni Estate, Lapuz.
Ang mga ahensya nga nag buylog sa clearing operation amo ang City Legal Office, City Engineering Office, City Assesors Office, Barangay Affairs Office, Philippine National Police, Highway Patrol Unit, Land Transportation Office, Department of Works and Highways kag mga tiglawas sang Department of Interior and Local Government.
Samtang, ginpahangop naman ni Punong Barangay Efren Gimeo sang Jalandoni Estate, Lapuz sa mga apektado nga pumuluyo ang pagpatigayon sang clearing operations.
Suno kay Gimeo, magluwas nga mando ini ni Presidente Duterte, magadul-ong ini sang kaayuhan sa tanan.
