ILOILO – ‘Under verification’ na ang identity sang pito ka ginapahayag foreign terrorist nga nakasulod sa Pilipinas.
Ini ang ginpasalig ni Captain Cenon Pancito III, tagpamaba sang 3rd Infantry Division sang Philippine Army, tuhoy sa nasambit nga isyu.
Sa interview sang Bombo Radyo kay Pancito, iya ginpahayag nga wala sang dapat kahangaw-an ang publiko bangud nga ginapaidalom sa monitoring ang mga terorista nga ginapahayag yara sa Sulu, Basilan kag Maguindanao agud nga maghanas sa local terrorist groups.
Suno kay Pancito, ang mga foreign terrorist ang eksperto sa suicide bombing kag ginapahayag isa tubtub duha ka tuig na nga naga-istar sa pungsod.
Ginpahayag ni Pancito nga ginabantayan sang Philippine Army nga indi makaguwa sa training grounds ukon wala sang spill over nga matabo.
Nagahingyo man ang natungdan sang bulig sang publiko sa pagpaalinton kun may yara sang makaduluda nga tawo sa palibot.
Nahibalu-an nga subong nga tuig, pila na ka suicide bombings ang natabo sa Mindanao.
