POTOTAN, ILOILO – Daku ang posibilidad nga mapahalin sa serbisyo si Patrolman Joerick Ace Ilisan, ang pulis sa Pototan Municipal Police Station nga nagpahubog, nagpalupok sang armas-luthang kag naghangkat sang inaway sa ila hepe nga si Police Major Ronnie Brillo.
Sa ginpatigayon nga session sa Sanguniang Panlalawigan, ginpamangkot ni Philippine Councilor’s League-Iloilo President Licurgo Tirador si Iloilo Police Provincial Office Director Police Col. Marlon Tayaba tuhoy sa status nanday Ilisan kag Police Corporal Esil Peñarubia.
Suno kay Tayaba, ginpaidalom na sa restrictive custody sa Police Regional Office 6 sanday Ilisan kag Peñarubia.
Ginpahayag man ni Tayaba nga mahimo nga mapahalin sa serbisyo si Ilisan nga amo ang naghangkat sang away sa hepe nga si Brillo.
Magluwas sa duha ka pulis, ginaduso man nga ipaidalom sa retraining sa Subic ang 19 ka mga pulis nga na-assign sa Pototan Municipal Police Station matapos ang natabo nga insidente.
