Indi magnubo sa pulo ka mga opisyales ang gina-alegar may kaangtanan sa korapsyon sa mga gaming activities sang Philippine Charity Sweepstakes Office.
Suno kay Presidential Spokesman Atty. Salvador Panelo, wala na sang may ginhatag pa nga detalye si Presidente Rodrigo Duterte magluwas sa numero sang mga opisyal nga naangot sa korapsyon.
Gani, kinahanglan lang nga hulaton ang mangin anunsyo sang Presidente.
Dugang pa sang natungdan, mahimo pangalanan ni Duterte ang mga naangot sa korapsyon sa insakto nga tion.
Nahibaluan nga ginsuspend ang tanan nga gaming operations sang Philippine Charity Sweepstakes Office apang matapos ang apat ka adlaw, ginbawi sang Presidente ang suspensyon sa lotto operations matapos nga wala sang anomaliya nga natutikban kag ang mga pagsulundan ang ginasunod man.
Ang iban nga mga gaming operations sang Philippine Charity Sweepstakes Office nga may mga prangkisa, lisensya kag permits kaangay sang Small-Town Lottery, Keno, kag Peryahan ng Bayan ang nagapabilin nga suspendido.
