ILOILO – Ginakabig sang Bureau of Fire Protection nga welcome development ang tuyo ni Presidente Rodrigo Duterte nga hatagan sang service firearm ang mga bombero.
Ini ang kasunod sang pahayag ni Duterte kadungan sang ika-28 nga anibersaryo sang Bureau of Fire Protection sa diin magluwas sa service firearm, nagpromisa man ang presidente nga hatagan sang dugang nga equipment ang nasambit nga ahensya sang gobyerno.
Sa interview sang Bombo Radyo kay Fire Supt. Crosbee Gumowang, Assistant Regional Director for Administration sang Bureau of Fire Protection Region 6, iya ginpahayag nga wala man sang malain sa plano ni Presidente Duterte nga hatagan sang service firearm ang mga bombero.
Suno kay Gumowang, magluwas sa pagresponde sa sunog kag sa pagbulig sa tion sang emerhensya, magaserbe man ang Bureau of Fire Protection bilang supporting bureau sang Armed Forces of the Philippines kag sang Philippine Army.
Sa pihak sini, ginpahayag ni Gumowang nga kun peace and order ang pagahambalan, ang Armed Forces of the Philippines kag ang Philippine Army na ang may yara sang primary role diri.
