ILOILO CITY – Ginapasigurado sang Department of Social Welfare and Development nga ginahatagan sang bulig ang mga pasahero sang tatlo ka pumpboat nga nagkulob sa Iloilo-Guimaras Strait.
Sa interview sang Bombo Radyo kay Regional Director Evelyn Macapobre sang Department of Social Welfare and Development 6, iya ginpahayag nga sang natabo ang trahedya sang Sabado, gilayon nga gin-activate ang mga social worker kag quick response team sa Iloilo kag Guimaras.
Suno kay Macapobre, naghatag na ang ahensya sang non-food items kasubong sang bayo, towel, banig kag malong sa mga survivor sang trahedya nga nagapabilin sa hospital kag sa mga evacuation center.
Magluwas diri, ginpahayag man ni Macapobre nga magahatag sang burial assistance ang ahensya sa mga nalisdan nga pamilya.
Samtang, wala naman nagapabaya ang Department of Health sa paghatag sang bulig sa mga pasahero nga nagapabilin sa hospital sa syudad sang Iloilo kag probinsya sang Guimaras.
Sa interview sang Bombo Radyo kay Dr. Mary Ann Sta. Lucia, regional violence and injury prevention alliance coordinator sang Department of Health 6, iya ginpahayag nga may yara na sang mga bulong nga ginpanghatag ang ahensya para sa mga pasyente kag mga body bags sa mga hospital.
Magluwas sa mga bulong, ginpahayag ni Sta. Lucia nga kinahanglan gid sang mga pasyente amo ang pyschosocial services bangud sa trauma nga natuga sang trahedya.
