BUENAVISTA, GUIMARAS – Luyag sang pamilya Grandeza nga magpasaka sang kaso bangud sa sala nga impormasyon nga ginhatag sang Philippine Coast Guard tuhoy sa natabo nga pagkulob sang tatlo ka pumpboat sa Iloilo-Guimaras Strait.
Sa exclusive interview sang Bombo Radyo kay Joshua Grandeza, utod sang survivor nga si Ma. Nieves Grandeza sang San Miguel, Buenavista, Guimaras, iya ginpahayag nga sang Biyernes nga adlaw, nagpadulong sa ila balay ang siyam ka miyembro sang pamilya Baguio agud nga magpamalayi sa iya magulang nga si Ma. Nieves.
Suno kay Joshua, sang Biyernes sang gab-i, na-istoryahan pa sang ila pamilya nga sa Mayo 20, 2020 patigayunon ang kasal apang wala pa sang venue.
Sang amo man nga gab-i, ginpahayag ni Grandeza nga tuman sa ila ka malipayon bangud nga kalaslon na ang iya magulang nga si Ma. Nieves kag ang live-in partner nga si Romeo Baguio Jr.
Bangud nga may trabaho ang kalabanan sa miyembro sang pamilya Baguio, naghingagaw sila sa pagpauli sa Cebu pagkasunod nga adlaw, Sabado.
Ginpahayag ni Grandeza nga sang adlaw mismo sang natabo ang trahedya, nagaduha-duha na nga daan ang pamilya Baguio nga magpauli apang sang naghulaw ang mamunog nga ulan kag nagkalma ang huyop sang hangin, naghingagaw sila sa pagsakay sa MV Jenny Vince kun sa diin nag-upod pa ang iya magulang nga si Ma. Nieves lakip na ang iya apat ka tuig nga anak agud nga magdul-ong.
Sang ila nahibalu-an nga nagkulob ang pumpboat suno sa natungdan, gilayon siya nga nagpadulong sa Buenavista Wharf agud nga magkuha sang impormasyon sa Philippine Coast Guard.
Ginpahayag ni Grandeza nga ginsabat lang siya sang isa ka personnel sang Philippine Coast Guard nga napasaka na sa barko ang tanan nga pasahero.
Bangud sini, nagsalig man sila suno sa natungdan nga hilway ang iya mga himata apang sang gab-i na, didto na nila nahibalu-an nga madamu pa ang missing lakip na ang mga miyembro sang Baguio family.
