ILOILO CITY – Usisaon sang Philippine Coast Guard Headquarters ang natabo nga trahedya sa Iloilo-Guimaras Strait sa diin tatlo ka pumpboat ang nagkulob bangud sa malain nga tyempo.
Sa interview sang Bombo Radyo kay Commodore Allan Victor Dela Vega, district commander sang Philippine Coast Guard-Southern Visayas, iya ginpahayag nga ang national headquarters na mismo sang Philippine Coast Guard ang maga-usisa kun nga-a tatlo gid ka pumpboat ang nagkulob sang Sabado nga adlaw.
Suno kay Dela Vega, hibaluon kun nga-a ginpahanugutan sang Philippine Coast Guard-Iloilo nga magbyahe ang mga pumpboat nga nagresulta sa 28 ka patay, 52 ka survivor kag 6 ang missing.
Ginpahayag ni Dela Vega nga katuyu-an sang maritime investigation amo nga mahibalu-an kun bala may dapat nga bag-uhon ang protocol sa pagpahanugot nga makabyahe ang mga pumpboat sa tion nga malain ang tyempo.
Gindugang pa sang natungdan nga palamangkutanon kun nga-a ginpahanugutan pa nga magbyahe ang MB Jenny Vince bisan nga nagapadayon ang rescue operation sa mga pasahero sang nagkulob nga MB Chi-Chi kag MB Keziah 2 matapos naabtan sang pugada sa tunga sang lawod.
May kaangtanan naman sa pagsuksuk sang life jacket, ginpahayag ni Dela Vega nga may yara sang ammendment nga ginpaguwa ang Maritime Industry Authority sa diin ginapahanugutan nga uyatan lang sang mga pasahero ang life jacket.
