BUENAVISTA, GUIMARAS – Nagahingyo sang bulig ang Provincial Government sang Guimaras sa Philippine Coast Guard agud nga mahatag ang mga food packs sa mga na-stranded nga pasahero kag mga survivor sang trahedya nga yari sa syudad sang Iloilo.
Sa interview sang Bombo Radyo kay Buenavista, Guimaras Mayor Eugene Reyes, iya ginpahayag nga wala pa nabiyahe gikan sa Guimaras ang mga food packs nga para kun tani sa mga na-stranded nga pasahero sa Parola Wharf.
Suno kay Reyes, nagatinudlu-anay ang Philippine Coast Guard kag ang Iloilo City kag Guimaras Provincial Disaster Risk Reduction and Management Office kun sin-o ang may jurisdiction sa pag-transport sang food packs bangud nga wala sang biyahe ang sakayang-pandagat.
Kun tani suno kay Reyes, may yara sang ipahulam nga sakayang-pandagat ang Philippine Coast Guard agud nga mahatag na ang food packs sa mga na-stranded nga pasahero kag mga survivor sang nasambit nga trahedya.
