DUMANGAS, ILOILO – Nagakaagnas na sang nasapwan ang bangkay sang isa ka bata nga biktima sang Iloilo-Guimaras tragedy.
Sa interview sang Bombo Radyo kay Arande Detablan, pinuno sang Municipal Disaster Risk Reduction and Management Office sang Dumangas, Iloilo, iya ginpahayag nga ang mga manugpangisda ang nakakita sa bangkay nga nagalutaw-lutaw sa lawod sa Lapus-Lapus Island, Brgy. Bolilao, Dumangas, Iloilo.
Suno kay Detablan, indi na makilala ang hitsura sang biktima bangud nga nagakaagnas na ang lawas kag madamu sang kinadtan ang guya sang biktima.
Ginpahayag ni Detablan nga gindala na sa punerarya ang bangkay.
Mismo ang iloy nga si Ma. Nieves Grandeza sang Buenavista, Guimaras ang nagkilala sa bangkay nga amo ang iya anak nga si Daniel Baguio.
Nahibalu-an nga siyam ka miyembro sang pamilya Baguio gikan sa Cebu ang nagpadulong sa Guimaras agud kun tani mamalayi sa pamilya Grandeza apang tanan sila ang napatay sa trahedya lakip na ang live-in partner ni Ma. Nieves nga si Romeo Baguio Jr.
